Wat för en schöne Boßeldag!
Egentlich schull dat Boßeln ja in de August ween, aber dor hebbt wi veel to veel Regen hatt un mussen dat Boßeln verschuben. Nu hebbt wi September un dat hett worr de ganze Week regent. Över 80 mm sind op unse Fenn fullen un so weer dat worr nich möglich, in Welt oder Vollerwiek to boßeln. Dat Boßeln aber noch mal to verschuben gung uk nich.
So wurr vun de Vörstand afmaakt, de Boßelbahn in Böhl an de Diek optobuen.
En Pries- un Konkurrenzboßeln för all! Deerns, Jungs, Fruuns- un Mannslüüd an een Dag. Dat hett dat bi de Eiderbund al lang nich mehr geben.
So haalten wi an de Friedag de Peeranhänger vun Birger, um de Bahn, de Bänke un de Getränke intoladen. Dat weer för unse 2. Vörsitter Torben doch to anstrengend un so full he bi’t Tobettgahn de Trepp rünner. So kreeg he för 2 Nächte en Stuuv in’t Tönner Krankenhuus.
Dormit all de Boßler Bescheed wussen, dat dat Bosseln in Böhl is, hett Andrea morgens mit de Zeitung en Infoblatt verdeelt.
De Sünnabend fung bi’t Opbuen uk worr mit Regen an, aber denn worr dat Woller beter.
De Fruuns brochten Kaffee, Brötchen un Koken mit an de Diek un vun Kai kregen wi de kolen Getränke.
As wi Klock 10 mit de Standkampf anfungen, keem uk de Sünn dör. So worr dat för all Boßler en schöne un warme Dag an de Diek.
Över 40 junge Lüüd un 25 Mannslüüd gungen an de Start. Bi de Jungs smeet Jannis Meister mit sien 11 Johr tolle 120 m un bi de Manslüüd wunn Tjark Bischoff mit 192,5 m de Tagesbesten-Pokal.
Abends bi de Siegerehrung op unse Bolzplatz weer de Hütt goot besöcht. Ik kunn unse Bürgermeisters ut Welt un Vollerwiek, unse Ehrenvörsitter Konrad un de Ehrenmitglieder Hans-Richard un Hanne begröten.
Toll weer uk de Insatz vun Herrn Hrisch, de de ganze Dag un abends vun unse Wettkampf Biller för de Zeitschrift „Geo“ maakte.
Gonne un Yvonne verdeelten de Priese un Pokale an de Deerns un Jungs, ehr Yvonne un ik de Pokale an de Fruuns- un Mannslüüd överreichten.
To Eten harrn de Fruuns Gyros vörbereidt, wat bi all goot ankeem. Kai sorgte mit sien Utschank bi en milde Septemberabend för en gemütliche un fröhliche Utklang.
Lüch op!

Dirk Meister